Thursday, 18 February 2016

Mumbai se ravaanaa huyi us Private Bus ke driver, Dayaaram ne highway par dur ek caar ke paas hathon kaa ishara karnewale us vyakti ko dekh kar apni bus ki gati kam ki, aur gaadi raaste ke kinare rok di. Waise Dayaaram aise andheri raat ko kisi ke liye bhi gaadi nahi rukaata tha, par band giri gaadi aur suit boot mein khade vyakti ko dekhkar uske man mein koyi sandeh paida nahi huva aur usne gaadi rok di.


"Saahab, gaadi band ho gayi hai, aage kisi bhi gaanv mein chhod doge kya...? kisi garage se kisi ko toh leke aato hun aisa socha...", woh vyakti Dayaaram se bola.

"thik hai... chalo chhod deta hun, andar jagah rahegi toh dekh lo, nahi toh idhar cabin mein hi baithna padega..." Dayaaram ne us vyakti ko kaha.

Us vyakti ka nasib achcha tha, gaadi mein use ek seat khaali mili. Usne bagal mein kaun baitha hai yeh dekhne ke liye bus mein ke deam light mein dekhne ka prayas kiya. Bagal mein ek laghbagh 22 ya 25 baras ki ek yuvati apni aankhen munde baithi thi.

Handbag se usne apni shawl baahar nikali aur pure sharir ko lapetkar woh wahin par baith gaya, baahar ki thand se achcha andar ki garmaahat use achchi lag rahi thi.

Thodi hi der mein bus ne apni puri raftar pakad li. khidki se baahar ki thandi hawayein aa rahi thi, us yuvati ke baal us haawaon se baarbaar uske chehre par aa rahe the. Jab thandi jyada sehan nahi ho payi tab 'usne' 'us' yuvati se kaha, "kripaya, khidki jara band kardein toh meharbani hogi...? bohot thand lag rahi hai..."

Us yuvati ne uski taraf dekhe bagair khidki band ki aur wapas so gayi.

Bus ke lights abhi purnatah band ki gayi thi. Laghbagh bus ke sabhi yaatri so gaye the. gaadi kaa aawaz, bich mein se hi jalad gati se jaanewale Truck kaa aawaj, aur unke Headlights ki roshni, ekdam halki si khuli huyi khidki ke daararon se aanewaali thand haawaon kaa aawaj sab kaise ek taal se taal milaakar chal rahe the.

Bus mein abhi ekdam mast garmaahat nirmaan ho gayi thi. Woh vyakti bhi apne sharir par shwal ekdam tight lapet kar so gaya.

3 se 4 ghante ho gaye rahenge usko soye huve, itne mein uske haath ko thandaa sparsh lagne ki vajah se achanak uski nind tut gayi . Uske haath par bagalwaali yuvati ka haath tha.

Usne dhire se uskaa haath uthaakar side mein rakh diya.

Thodihi der baad punhah uske ungliyon ko uske thand haathon kaa sparsh huva. Usne apni aankhen kholkar uski taraf dekha, woh abhi tak soyi huvi hi thi.

Usne apna haath baaju mein kiya.

Thodi der baad fir se wohi sparsh, usne fir se uski taraf dekha, bagal se gujaranewaale ek gaadi ki roshni uske chehre par padi aur woh ek kshan ke liye achambit huva.

'woh' uske taraf hi dekh rahi thi.

Matlab yeh sparsh jaanbujh kar kiye jaa rahe the toh...

Isbaar woh vyakti pich hatnewaala nahi tha, usne apne haath uske haath ke niche sarkaya aur uska haath pakad liya, dono ne ek dusre ke haath majbuti se pakad liya aur haathon ki garmaahat mehsus karne lage.

Thodi der baad us yuvatine apne haath ki pakad dhili ki, us yuvati ne apne haath se us vyakti ke haath ke niche se lekar shoulder tak halkse firaa rahi thi.

Uske sparsh se us vyakti ke andar ek romanch aur, pure sharir mein kaante aane lage, uske kaan garam ho gaye the, uski ungliyon ke sparsh se uske sharir ka har ang ang uttejit ho utha tha.

Achanak bus ko ek jordaar jhatka laga aur ek ajib saa aawaj karti huyi gaadi raste ke kinaare aakar khadi huyi.

Bus kaa akseltryk tut gaya tha.

Bus ki saari lights prakashit huyi toh uski tandraa bhang huyi, usne apna haath turant khinch liya.
Cleaner ne bus mein aakar ghoshnaa ki, 'Bus repair hone mein samay lagega...'

Apni aadhi nind se jaage huye yaatri waapas so gaye, aur baaki ke yaatri 'bidi-cigaratte' ke liye niche utar gaye.

Bagalwaali yuvati baahar nikli, baahar nikalte samay uske sharir ka usko huva sparsh uske sharir par uttejana ki lahar de gaya, uske sharir se aa rahe mand sugandh se uska man prafullit, romanchit ho utha.

Woh khidki se jhuk kar baahar dekhne laga ki woh yuvati kidhar jaa rahi hai.

Raaste ke side mein kuch duri par kuch roshniyaan chalak rahi thi. 'Samarpit Lodge' tube lights ki roshni se usne board par ke akshar padhe.

Us yuvatine ek baar piche mudkar uski taraf kuch kshan dekha, aur waapas piche mude bagair woh aage chalne lagi.

Us vyakti ke man mein hadbaadahat utpann huyi... woh apni jagah se uth ke khadaa raha.

'takriban kitna samay lagega...?' usne cleaner se pucha.

'ek ghantaabhar toh jarur lag jayega...' cleaner ne jawab diya.

'thik hai... mein idhar hi hun...' itna kahkar woh vyakti us yuvati ke piche piche chalne laga.

Baahar thand jyaada thi parantu haawaayein maatra band thi, usne upar aakash mein ek najar daali. Chaand baadal ke piche chupaa huva tha. kale ghane baadal ghir aaye the, jaisa ki use lagne laga tha ki abhi barsaat shuru ho jayegi aur usko bhigo degi.

Woh yuvati abhi bhi piche dekhe bina aage aage chal rahi thi.

Lights ki roshni mein uski najar us yuvati ke purn sharir par se fisal rahi thi, waah kyaa figure thi, ekbaar dekhnewaalon kaa dil lalchaa jaye, sharir ke yogya jagah par ekdam satik aakar uska man uski taraf khinch rahe the. woh khinchaa saa uske piche piche chala jaa raha tha, jaise ki koyi lohchimbak ho.

Woh yuvati lodge mein ghusi aur counter ke saamne khadi ho gayi.
Kaan-topi, maflar lapetkar counter par baitha huva yuvak usko dekh kar muhn tedhaa kar ke utha.

"bhaiyya, meri bus band ho gayi hai aur aisa mujhe nahi lagta ki ek do ghante mein shuru ho jayegi. Meri tabiyat bhi thik nahi hai, kuch ghante ke liye room chahiye..." dur band gire apni bus ke taraf ungli kar ke ishara karte huye woh yuvati boli.

Us counter boy ne drawer mein se ek chaabi nikali aur uske saamne fenk di. Uski adhik information lene ke liye usne saamne kaa register apne saamne khola hi tha ki uski najar darwaaje se andar aanewaale vyakti par padi. Woh counter boy gaalon gaalon mein hi muskuraya aur usne waapas register band karke punhaa rakh diya aur apne chehre par shawl odhkar so gaya.

Woh yuvati sidhiyaan chandhne lagi, woh vyakti bhi uske piche piche upar gaya.

'103', woh darwaje ke saamne hi khadi thi aur usne apne paas ki chaabi se darwaja khola.

Donohi andar aane par us vyakti ne darwaja andar se band kar diya, us room ki roshni mein woh pahili baar use dekh raha tha. Us yuvati ki aankhon mein ek kasak thi, ek ajib saa nasha tha, woh bhi itna ki us vyaki ko apne sharir mein ka aatma uske sharir ko faad kar us yuvati se baahar milne ko aaya huva ho aisa lag raha tha. Uska gala sukh chuka tha, dil ki dhadkane badhne lagi thi…, us yuvati ne apna haath aage kiya.

---------------------

"chalo... fataafat baitho gaadi mein... aa gaye kyaa sab ke sab...?" cleaner ne ek baar aawaj de kar andar najar ghumayi... nikal ne se pahile usne ekbaar sab logo ko gina... seat number D 5-6 khaali the.

"abhi yeh dono kidhar gaye...?" khijtaa huva cleaner waapas bus se utar gaya, yahan wahan sab jagah par dhundaa lekin use woh dono kahin bhi dikhayi nahi diye.

'are... woh log thodi der pehle us lodge mein jaate huve dikhe... jara dekho udhar hi honge..!!', ek yaatri bich mein hi bol pada.

Cleaner khijtaa huva man hi man gaali badbadataa huva lodge mein ghusa, counter boy ekdam gehri nind mein soya huva tha.

"iski maa ki aankh... mar gaya kyaa ye...?" cleaner ne jor jor se hila hila kar use jagaya.
"idhar ek ghantebhar pahile koyi aaya tha kya...?" cleaner ne us 'yatri' ka varnan bataya.

'haan, woh aaya huva tha aur uske saath ek ladki bhi thi... upar hi honge dekho room no. 103 mein' sidhiyon ki taraf haath dikhakar woh fir se apni aankhon par shawl odhkar so gaya.

'lo kar lo baat... udhar andheron mein hum inko dhund rahe hai aur yeh dono idhar mauj masti kar rahe hai...' cleaner badbadata huva do-do sidhiyan chadh kar upar aa gaya... room no. 103 ke andar ki lights abhi bhi jal rahi thi.

'o saahab.. agar ho gaya rahega toh chalo, gaadi taiyyar hai...!' cleaner ne aawaj lagakar darwaja thapthapaya.

Lekin andar se kuch aawaj ya pratiuttar, aur halchal nahi mehsus ho rahi thi.

'o saahab.. aa rahe ho kya...? yaa fir chhod du gaadi...?'

'o maadam... aa rahi ho kya...? ki jaayen yahan se... aakhri baar puch raha hun...!' cleaner nikal ne ke hi taiyyari mein tha.

'maro tumhari maa ki aankh... jaata hu mein' aisa bolkar cleaner jaane ke liye nikla.... usi waqt counter boy khijtaa huva upar aaya... aur bolne laga, ' kyaa huva...? kyun chillaa rahe ho...? aap jaao naa nahi aane kaa rahegaa unko...'

usne dhire se darwaje se kaan laagakar dekha... andar se koyi bhi aawaj sunayi nahi de rahi thi, aur halchal bhi mehsus nahi ho rahi thi.

usne bhi do-tin baar darwaja pit pit kar dekha... fir baad mein uske man mein shak paida hone laga.

'iski maa ki... bhaag gaye kyaa jab mein so raha tha...?' us counter boy ne apne maathe par haath maarte huve bola.

'aise kaise jaayenge... bus toh idhar hi hai..!!', cleaner bola.

'kuch toh gadbad hai...' itna bol kar woh counter boy niche bhaagta huva aaya aur drawer mein se room ki duplicate chaabi nikal kar wapas bhagta huva saa upar aaya.

Dur se Bus ke horn kaa aawaj sunaayi de raha tha...

Counter boy ne laaye huve duplicate chaabi se room khola. saamne kaa drushyaa dekh kar dono ki hi saans upar ki upar aur niche ki niche ruk gayi... hum jo dekh rahe hai woh sahi hai ki dusraa kuch hai aisa unko kuch kshano ke liye laga.

Saamne ki bed par ardhnagn dhang se us yuvati ka mritdeh pada huva tha... uske sharir ki chirfaad ki gayi thi...jaise ki ek takiya faad diya ho...

Inspector Ravi, Shirgaon gaav mein DCP ki pad par niyukt the... kuch thode bahut gunah chhod kar Shirgaon gaav vaise toh shant hi tha, isliye kabhi bhi Ravi par kaam ka jyaada bojh nahi aaya.

Us din bhi ghar ke bane huve Chicken Biryaani par taav maarkar Ravi gehri nind mein so gaya tha... usi darmiyaan Police Station se gunah ki khabar denewala phone aaya tha aur khijte huve, thand mein Ravi ne apni vardi pehenkar ghar ke baahar nikal gaya.

Hotel ka parisar Police ke gaadiyon se, Ambulance se, aur Bites milne ke liye aaye huve patrakaaron se khachakhach bhara pada tha. Hotel ke 103 no. room mein Inspector Ravi panchnaama kar rahe the. 15 saal ke apne carrier mein Ravi ne pahili baar itni krur, nirdayi hatya dekhi thi... photographers photo nikal ne mein vyast the.

"Inspector Alex, koyi fingerprints mile kya...?" Ravi ne pucha.

"Sir, lodge hai yeh, bohot saare logo ke fingerprints mile hai..., gunahgaar ke kaunse hai yeh ekdam thik se nahi keh sakte..." Alex....

"Hmm... thik hai us counter boy aur hotel ke dusre logo ki cross checking ki kya...?" Ravi

"haan saahab... usne room ki chaabi is ladki ko hi di thi... woh soya huva tha isliye isne us ladki ke saath aaye aadmi kaa varnan ekdam barabar nahi bata saka hai..." Alex...

"Thik hai, ek baat batao, gunaah maalum padne ke pehle kisi ne us aadmi ko baahar jate samay dekhaa tha kya..? matlab lodge mein se hi kisi ne...?" Ravi

"nahi saahab..., kisi ne bhi nahi... hum ne idhar aate hi turant lodge ko seal kar diya... uske baad koyi bhi baahar nahi gaya... iska matlab yahi hai ki gunaahgaar pahile hi baahar nikal gaya tha..." Alex...

"Bus ke yaatri, Driver, Conductor, Cleaner kisi ne toh use dhang se dekha hoga...?" Ravi jhallate huve bola.

"vaise ekdam thoda thoda varnan hai apne paas, kal us varnan par ek chitra banakar dekh lete hai... par 'usko' dekhte hi koyi pehchaan lega aisa abhi filhal toh koyi bhi nahi hai.." Alex.

"thik hai, yeh Bus jidhar se nikli hai udhar jaanch padtal karo.. ticket nikaalte samay, yaa bus mein chadhte samay kisi ne toh use dekha hoga..." Ravi

"saahab... woh aadmi bich raaste mein hi baitha tha bus mein..." Alex

"bich mein hi...? matlab...?" maathe par bal laate huye Ravi Bola.

"bich mein hi ka matlab saahab... driver bola ki Naasik exit par usko raste ke kinaare ek band gaadi dikhi aur uske samip hi khade us aadmi ne lift maangi... wohi aadmi tha..." Alex...

"are Alex, yeh baat tumne mujhe pahile hi bata deni chahiye thi...! abhi ke abhi kisi ko toh udhar bhej do... woh car abhi bhi udhar hi rahegi toh koyi na koyi toh thos sabut milega. Driver se us car ka varnan, matlab rang, konsi gadi thi vaigere information ikattha karo..." Ravi hyper hote huve bola.

"haan saahab..., Inspector Matroo turant gaadi lekar gaye hai us exit ke paas..." Alex.

"aajubaaju koyi basti hai udhar jaanch padtal karo, raat ko kisi ne kisi ko toh aate jaate dekha kya...? aur apne gaav mein naye aaye huve aadmi kaa baarike se jaanch karo, woh kidhar se aaya hai, kis ke saath aaya hai, uske proof ki jaankari thik jama karo..." Ravi

"thik hai saahab..." itna bolkar Alex wahan se dusri jaankari ikattha karne ke liye nikal gaye.

"Inspector King, body ko postmortem ke liye bhej do... aur khun karne se pehle body par balaktar huva hoga toh aisa panchnaama mein mentioned karo... postmortem ka report aur baaki ke papers, mein subah aane se pehle mere table par rakho..." aisa bolkar Inspector Ravi baahar nikal gaya.

Baahar khade do hawaldar jama huye patrakaaron ko andar jaane se rokne ki naakam koshish kar rahe the. Body baahar laate hi news reporter ne ek hi gardi ki lekin unko kuch jyaada information hath nahi lagi.

Road ke dusre side khet mein chup kar khadaa rahkar 'woh' sab kuch dekh raha tha... police ki gaadi aur ambulance ko baahar jaate samay usne dekh liya... do minute usne man hi man kuch vichar kiya aur fir andheron mein khet mein se rasta nikal kar woh bhi wahan se chalta bana.

 Apne room cum office ke ek gandi chair par Detective Rahul soch vichar karta huva baitha tha. Daadhi badhi huyi, gande kapde dekh kar uske paas kaam leke aaya huva client bhi uski dasha dekh kar nikal jata tha. Office ekdam kayi tarahon ke papers se bhara huva pada tha, table par aur idhar udhar khatam ho chuke cigarattes ke buts gire pade the.. ek kone mein aadhe kaate huye news-papers ka puthanna rakha huva tha... bohot dino se saaf-saafayi naa hone se wahan dhul ki jamavat ho chali thi.

Rahul ki detective company shuru karne ki idea puri fail ho gayi thi... shuruvat mein aaye kuch clients chhod kar usko jaisi koyi safalta nahi mili... kuch kaam toh aise hi pending the... par divorce ke case ke liye proof jama karna, kisi businessman ki ladki par najar rakhna, shaki pati ke patni par najar rakhna aise boring kaam kar ke Rahul pura kantaal gaya tha... uske buddhi ko chaalnaa denewali, uski kshamata parakhnewali aur samay samay par yogya paisa denewaali ek case usko chahiye thi, jo usko nahi mil rahi thi.

Table par karjdaaron ki list, aur kuch bills pade huye the... Rahul ne hatbal hokar ekbar unpar apni najar ghumayi... apnaa bhi koyi posh office hona chahiye, dictation lene ke liye aur appointments tay karnewaali secretary honi chahiye, thode bahut clients, car-driver aisi thode bohot sapne uske jo abhi tak adhure the.

Rahul ne apni pant ki jeb mein hath daalkar bache huye paison par ekbaar najar daali... dus rupaye ki ek note aur kuch chillars baaki the... 'chaay yaa cigarette...?' Rahul ne man hi man vichar kiya... aakhikaar ek cigarette leke baaki ke bache huye paise kal ke liye rakhne ka man banakar Rahul lakdi ki sidhiyan utar kar niche aaya.

Corner ke paan ke thele se usne ek cigarette kharedi... us paanwale bhaiyaa ko Rahul ke prati jigyaasa thi.. aur Rahul bhi use kuch bhi kahani banakar, mein ek detective hu aisi chaap chhodne kaa prayas karta tha.

"kyaa... Rahul bhaiyya... kaisa chal raha hai aapka kaam...?", cigarette dete dete paanwale ne pucha.

"thik chal raha hai.., waise aajkal ek bohot important case pe kaam kar raha hun... thoda busy hun..." Rahul ne aisa hi thok diya.

"are chodiye woh case, aap woh case kyun nahi hath mein lete... apne baajuwaala gaav hai naa Shirgaon wahan pe ek ladki kaa khun huva hai.."

"kaunsaa case...?", chehre par kuch bhi bhaav naa laakar usne pucha...

"are wohi... Shirgaon gaav kaa case... ek ladki ka lodge mein kisine katl kar diya... lagta hai koyi sarfira killer hai... ee dekhiye..." aisa bolkar usne apne paas ke paper mein aayi huyi woh ghatna Rahul ko dikha di.

Rahul ne apni tikshna najron se fataafat sab ghatna padh dali... aur woh paper wapas karte huye bola, "arey chhodo yaar..., kya aise chote chote cases lene ka, mein toh kuch bade chij pe kaam karnewala hun..." waapas ek baar thok kar Rahul wahan se nikal gaya.

Office mein waapas aane par usne apni cigarette jalayi... ek do lambe kash lene ke baad woh sochne laga...

'kya kare...? waise bhi kuch kaam toh nahi hai... aise hi khaali baith kar buddhi par jang chadhne laga hai... isse achcha yahi hai ki udhar bhaag-daud karne se kuch haath laga toh prasiddhi toh milegi...' bachi kuchi cigarette khatam kar ke Rahul office ko taala lagakar baahar nikal gaya.

Sab se pehle woh 'muft vachnalay' mein gaya... udhar ke ek-do din purane Shirgao gaav ke news denewaale sab news papers side mein nikal liye aur fir ek corner mein baith kar ek ek karke sab news padh daale... uska dimaag har baat ekdam baarike se padh raha tha aur haath kuch notes likhne mein vyast tha.

Raat ko der tak ruk kar usne aawashyakta purvak jaankari ikattha ki aur ghar waapas aa gaya.

Aate aate hi usne cupboard se kuch achche kapde nikal ke suitcase mein bhare... bohot jyada use kiye huve razor ko ghasit ghasit kar shave ki... fir ekdam swachch saan kar ke aaine ke saamne khada huva...

Utsaah se aur aatmavishwas se bhara huva chehre ka ek naya hi Rahul ka aks use dikhayi diya... 'mere paas yahi aakhri awsar hai...', usne man mein hi soch vichar kiya... is baar agar kaam nahi huva toh utsaah se shuru ki gayi detective company band karne ke sivay uske paas koyi aur chaara bhi nahi bacha tha.

Usne room mein ekbaar najar daudayi... showcase par uska bill naa bhara huva band pada huva mobile pada tha... 'mobile handset bech kar kuch din ke liye paison ka jugaad ho jayega...', usne aisa sochte huye woh mobile apni jeb mein daala aur apne kapdon ki bag lekar woh darwaje ko taala lagakar nikal gaya.

----------------------------

"arey ye Raaju... are idhar toh aa jaraa...", Dhannalal paper mein ki khabar padhte huve bole. Dhannalal 'Shirgao' gaav ke sarpanch aur mahadev sena ke adhyaksh... bolne mein gaav ki bhaasha hai lekin fir bhi bohot bada hoshiyar tha... chaal-chalan mein ek raubdaar vyakti... gaav ke log unse thoda dar kar hi rehte the... gaav ka jhagda aur maaramaari Dhannalal sirf jaane se solve ho jaate the... gaav ke bichobich bohot badi Haweli, gaav ke baahar kayi prakar ke falon ke ped, jwaar ki kheti aur usme kaam karnwaale bohot saare log... gaav mein do petrol pump, baahar aane jaane ke liye gaadiyan, haath mein sone ki anguthiyan, chehre par ek raub aur usi ko suit hoti huyi badi muchyein... sharir par jyadatar kadak istri ka cream shirt, swachcha safed patlun aur charrr-chaarr karnewaali kolhaapuri chappal.

Pepar mein ke us ghatna par apni ungli dikha kar Dhannalal Raju se baat kar rahe the, "arey yeh Savita hai naa...? arey khun huva bolte hai uska gaav ke baahar ke lodge mein..."

"haan saahab..., wohi raand saali... apne karmo se mar gayi... mil gaya rahega koyi psycho..."

"hmm... kyon re raaju... marnewalon ke bishay mein koyi aisa bolta hai kya...?" Dhannalal..

"kshamaa karein saahab, par woh thi hi waisi ladki, puraa gaav bolta hai aisa..." raaju apni gardan jhuka kar bola..

"arey rahegi woh waisi, par ab murdaa ho gayi naa...? thik hai, thodi der baad gaadi nikaal, ek baar apne ko uske ghar jaanaa hoga aur baad mein police station Ravi saahab ko bhi mil kar aayenge... kya...?"

"thik hai saahab... nikaltaa hun gaadi... subah hi ekdam chakaachak dho di hai..." Raju lawn mein se bhaagte bhaagte huye bola.

Dhannalal ne woh ghatna puri ki puri padh daali aur fir saamne rakha huva adrak milaya huva chaay funk maar maar kar pine laga...

 Savita ko abhi mare huye ek hafta bhi nahi bita tha ki Shirgaon gaanv ko unki sabse priy vyakti Munnidevi ka bhi mrutyu dekhna pada.

Savita ke jaane se shayad kisi ko itna dukh nahi huva hoga... lekin Munnidevi ke jaane se pure gaanv mein khalbali machi huyi thi...

'Shirgaon' gaanv par ek prakar kaa sannataa faila huva tha... gaanv ke aur baahar ke school ko chuttiyan mil gayi thi... gaanv ke kaamkaaj aur vyavhaar thand pade the... har aadmi ek dusre ko shak ki najronse dekh raha tha... gaanv ke konse bhi lodge, yaa dharmshala mein koyi anjaan vyakti aaye toh uski jaankari police station par batayi jaaye aisi vyavastha unhone kar ke rakhi thi... gaanv ke nirjan sthal, gaanv ke baahar ke kheton mein, purane haweli mein gaanv waalon ko jaane ke liye pratibandh laga diya tha... gaanv mein aisi anjan vyakti abhi tak dikhayi nahi di thi... gaanv ke baahar ki khaali haweliyon mein, aur aas paas ke parisar mein bhi dhundaa gaya, lekin wahan par kisi ke rahne ke nishaan nahi mile...

"kaun hoga yeh khuni...? kya motive hoga uska...? jo katl huve hai usmein dono ka aapas mein kuch bhi dur dur tak sambandh nahi tha... khuni sahi mein psycho hai...?" aise anek prashno se police waalon ka sar chakraa jaa raha tha... lekin uske jaawab kuch kar ke bhi abhi tak mile nahi hai...

Jilha ke vedshala ne diye huye andaaj ke anusar kuch din tak baarish ki aashanka thi aur uske atirikt baadal bhi aa gaye the... dinbhar baadal ghir aane se hawamaan bhi thoda ajib lag raha tha... saare kaale baadal jaise ki Shirgaon ko hi bhigone aaye huye ho...

-------------------------

'Shirgaon' gaanv mein sansani fail gayi thi... gaanv ke baahar ke lodge mein ek yuvati ka khun hoke kuch din hi bitein the ki kal hi gaanv mein ek aur bali di gayi thi... police station ke saamne gaanv ke patrakar aur masala news ki khoj mein shahar se aaye huye patrakaron ka jamav huva tha...

'ye dekho... tum log khalifokat yahan par halla mat karo..., jaanch puri ho jaane par tumhe puri jaankari de di jaayegi...' Ravi patrakaron ko baahar nikalte huye bola...

'kab hogi tumhari jaanch puri...? pehle hi do logon ka katl huva hai, ab aur kitne logon ko apni jaan gawani padegi...?' ek reporter...

'hamari jaanch chaalu hai... adhik...'

'kyaa jaanch chaalu hai...? kya jaankari aapke haath mein lagi hai...?' dusra reporter...

'yeh kaarya ek serial psycho ka hi rehne chahiye...' Ravi...

'kaise...?', reporter...

'kaise nahi batao...?', Ravi khijte huva bola, 'ye dekho dono hi khun mein katl karnewaale ka koyi motive nahi dikh raha hai... yeh dono khun ek ke piche ek huye hai... aur katl ke liye upyog huva chaaku yeh ek hi banavat ka tha aisa doctoron ka kehna hai...'

'isse jyada adhik jaankari filhal toh hamare paas nahi hai... adhik jaankari aage ki jaanch ke baad hi khulaasa kar sakenge...' Ravi...

'iska matlab tumko yeh kehna hai ki is gaanv mein ek psycho killer sare-aam ghum raha hai... aur filhal toh tumhare haath mein koyi saboot / jaankari nahi hai...? aur jab tak tumhari jaanch puri nahi ho jati tab tak gaanv ke logon ko us psycho killer ke haathon marte rehna padega...?' khijte huye reporter log Ravi se saawal puche jaa rahe the..

'ye dekho mujhe aisa kuch bhi bolne ka nahi hai, hamari jaanch shuru hai, adhik jaankari mili toh tumhein khabar di jaayegi...' aisa bolkar Ravi ne un reporteron ko baahar nikalne ki shuruvat ki...

-----------------------------

"hello inspector...", apne chehre par sadaiv rahnewali impressive smile laate huye Rahul bola...

"hello...", kuch khijte huye aawaj mein Ravi bola, "aap...?"

"mein Rahul... detective Rahul..." apni jeb se aapna detective agency ka card nikal kar woh Ravi ke hath mein dete huye Rahul bola...

Ravi ne woh card le liya aur Rahul ko baith ne ka ishara kiya...

Rahul ne baithte samay hi aapne paas ki file jismein detective agency ka government certificate, najdik ke police station ka maanyata prapt letter, aur kuch kaagaz patra the woh Ravi ki taraf sarka diye...

Ravi ne woh sab kaagaz-patra dhyanpurvak dekhe aur fir bola, "bolo detective Rahul, mein aapki kya madat kar sakta hun...?"

"mujhe gaanv mein haal-filhal huye katl ke baarein mein adhik jankari chahiye..." Rahul...

"Alex, Rahul saahab ko case paper dikhaav..." Ravi chidhte huye bola...

"Ravi saahab, mujhe aapke case paper nahi chahiye... usmein bohot si jaankari meine akhbaar mein padhi huyi hai... mujhe aisi jaankari chahiye jise abhi tak aapne reporteron ka ya aur kisi ko bhi di nahi hai...", Rahul apne chehre par ki smile kaayam rakhta huva bola...

"kshama karein Rahul saahab, lekin usse jyada adhik jaankari hamare paas nahi hai..." Ravi ka Rahul mein se interest chala gaya tha, aur woh fir se apne kaam mein magn ho gaya tha...

"all right, meine toh sirf puchne ka kaam kiya... jaankari kaise aur kahan se milegi yeh mujhe achchi tarah se pata hai Ravi saahab... fir milenge..." chair par se uthkar Rahul ne apna haath aage kiya... Ravi apne kaam mein magn tha... Rahul ne kuch der tak apna hath aage hi rakha aur fir woh jidhar se aaya tha wahin par wapas mud gaya...

-----------------------------

"are Dhannalal yeh mein kya sun raha hun...?", Munnalal pair patakta huva Dhannalal ke room mein aaya...

Munnalal Dhannalal ka chota bhai, parantu swabav se Dhannalal ke bilkul viparit... Dhannalal shant, soch vichar karnwale toh Munnalal matlabi, chidhnewala, aage piche ka naa soch kar jo man mein aaya woh karnewala...

Swabhav ke isi farak se Dhannalal uske maa-baap ke aur jyadatar school aur baad mein gaanv mein sab ke priy the... unke viparit Munnalal kam umra se hi jugaar, cigaratte, daaru, lafenge dost inki sangat paa kar sabse dur hote jaa raha tha... toh wahin par Dhannalal bachpan se jawabdaari sambhal kar gaav ke ek pratishtit vyakti ban gaye the... isi vajah se dono bhaiyon mein jhagde badhte gaye aur iske parinaam swarup Munnalal dusri haweli mein rahne laga...

"are Munna... jaraa... shant ho jaa..." Dhannalal gaanv ke hi kuch manyavaron ke saath baithkar charcha kar rahe the... Munna ko aise gusse se aate huye dekh kar unko sab ke saamne thoda ajib laga... "are kyaa huva jara batayega bhi...?"

"Dhannalal tum bol rahe the ki apne dakshin ki jamin mein se 25 acre jamin daan denewale ho..." Munnalal khade khade hi bol raha tha...

"han Munna... tumne barabar suna hai...", Dhannalal.

"are pitaji kya tere akele ke hi the kya...? mujhse kuch puchne ki rit hai ki nahi...? are us jamin par mein factory bananewala hun bataya toh tha tujhe...?", Munnalal...

"are 25 acre ka ek tukda toh tujhe de hi raha hun naa baaki ki jamin padi hai baaju mein... tu le lena...!", Dhannalal...

"nahi... mujhe kuch nahi sunna...! mera virodh hai isko... mujhe woh puri jamin chahiye... company ko vaisi jaban di hai maine...!" Munnalal...

"jaban toh hamne bhi di hai... Munna saahab...!", Dhannalal...

"are puchta kaun hai teri jaban ko...? us jamin ka har kona kona mere liye mahatva rakhta hai, bada nuksaan hoga mera... tujhe jamin batne ki masti hai na, toh apni yeh kharab haweli de de..., lekin us jamin ko hath bhi mat lagana...!!!", Munnalal...

"yah dekho Munna, us jamin ke najdik nadi hai, kunwein ko pani laga hai, agar garib logon ko woh jamin mil gayi toh unke pine ke paani ki badi samasya dur ho jayegi... hamne apni jaban di hai, usko wapas nahi le sakte..." Dhannalal apni baat par adig the...

"toh fir thik hai... aaj tak bohot sun liya tera.... bada bhai hai isliye bohot sehan kar liya... abhi mein bhi dekhta hun us jamin par factory kaise nahi khadi rehti.." Munnalal...

"Munna... meri jaan bhi chali gayi toh bhi chalega... par mera vachan mein kabhi nahi tod sakta..." Dhannalal gusse se bol pade...

"aisa kya…, thik hai.., teri jaan jane se udhar factory khadi rehti hai toh woh bhi mujhe manjur hai...!!" aisa bolkar jaisa Munnalal aaya tha waise hi pair patakte huye nikal gaya...

---------------------

'Shirgaon' gaanv ke ek saste se saste hotel mein Rahul ne room le li thi... arthat tabhi bhi apne paas bache huye paison ko sochkar ek hafte se jyada vakt woh idhar reh sakega aisa use nahi lag raha tha... use jaldi hi kuch pehal karne ki aawashyakta thi... haath mein pakde huye cigarette ke kash lete huye sab ghatnakram ka shuruvat se vichar kar raha tha...

"jidhar woh killer pahilbaar bus mein baitha tha woh jagah basti se vaise thodi dur hi hai... iska matlab woh aadmi kaun se toh gaadi se wahan pe aaya raha hoga athva usne khud ki gaadi laayi hogi...

agar woh vyakti gunahgaar rahega aur gunah karne ka hi hai isi uddeshya se udhar aaya rahega toh udhar tak aane ke liye who aisa nahi lagta dusre par tik kar rahega ya adhik se adhik logo ke sampark mein aayega... iska matlab yah hai ki woh khud ke gaadi se hi wahan par aaya hoga... aur aisa rahega toh usne jarur apni gaadi wahin aajubaaju kidhar toh chupaa kar rakhi hogi..."

Rahul turant apni jagah se khada huva...

Naasik exit par jab Rahul pahuncha tab shaam ke 4 baj gaye the... Rahul ne aajubaaju najar daudayi... najdik koyi bhi basti nahi thi... aajubaaju bade bade ghaas bade huye the... Rahul ne saadharan andaaj lagakar aajubaaju kaa parisar dhudne mein shuruvat ki... parantu ek ghantaa ho gaya tabhi bhi use aisa kuch mila nahi... takriban 1 kilometer piche jaane par Rahul ko raaste ke kinare se khet mein jaa rahe tyres ke nishan dikhe... Rahul un tyres ke maarks kaa picha karte huye ghaas mein ghus gaya... ghaas kaa ek bhaag ek baaju se daba huva dikh raha tha... jarur koyi naa koyi toh ek car idhar tak aakar gayi hai... ek jagah ki ghaas puri dab gayi thi, jaise ki koyi vajandar gadi bohot der tak vahan khadi rahi hogi...

"shayad yahi woh jagah rahi hogi, jidhar us vyakti ne apni gaadi chupa kar rakhi hogi...", wild gues...!!, par sanyog janch kar dekhne jaisi hogi... Rahul ko apne instincs par pura bharosa tha...

matlab aisa ho sakta hai, gunahgaar ne raste ke kinare Mr. Kaamesh ki band giri huyi gaadi dekhi rahegi, usne apni car ghuma kar idhar piche laayi aur ghas mein chupa di... fir woh band gire Mr. Kaamesh ke car ke paas aakar khada huva... bus driver ko laga ki usi ki gaadi band giri hai... usne uska fayda uthakar bus mein pravesh kiya...

jidhar bus band giri udhar ke lodge mein woh us yuvati ko kisi karan se lekar gaya, udhar uska katl kiya... aur fir woh wapas idhar aaya aur apni gaadi lekar nikal gaya... gaya... lekin kidhar...? jidhar se aaya tha udhar...? yaa jidhar jaa raha tha udhar...?" Rahul ka vicharchakra shuru tha...

Rahul ne waapas ekbaar dabe huye ghaas kaa nirikshan kiya... tyre maarks jis dishaa se andar aaye usi dishaa mein baahar gaye the... "... iska matlab... gunahgaar naasik se Shirgaon ya fir aage kidhar toh jaa raha tha... usne Kaamesh ki gaadi dekhi... udhar usne apni gaadi ghumake wapas piche li... aur ghaas mein lakar rakh di... isliye tyre marks daayi aur se daayi aur gaye huye hai...

gaadi ki disha thi naasik ki aur... aur usi dishaa mein gaadi reverse mein baahar nikli... iska matlab gaadi ka muhn abhi bhi naasik ki hi disha mein tha... aur iska matlab yeh ho sakta hai ki woh jidhar se aaya usi disha mein wapas gaya...

bas... isse jyada Rahul ko adhik kuch bhi nahi mila... usne kuch sabut aur kuch nishan dhudne ka bohot prayas kiya parantu 'clue' jisko bola jaye aisa kuch bhi nahi mila tha...

"chalo... aaj kaa din kuch kharab nahi gaya... jidhar se shuruvat kar sakte hai itna kuch toh mil hi gaya hai...", aisa soch kar Rahul wapas aa gaya...









aage ke update mein padhiye... "aisa bolte hai ki kabhi bhi kisi ke baarein mein galat nahi bolna chahiye... apne aajubaaju niyati ghumti firti hai... kabhi kisi ke muhn se nikla aur niyati ne 'tathastu' bol diya kuch bol nahi sakte... Dhannalal ke vishay mein aisa hi kuch galat toh nahi huva hoga naa...??? padhte rahiye... psycho..."

 "king, us hathiyar ke barein mein kuch adhik information mili nahi kya...?" Inspector Ravi doctor ne body ke postmortem report dene ke baad hatya karne ke liye use kiya huva chaaku ka ek andaaz lagakar banaya huva chitra dekhte huve bola... 9 inch lambaa, ek side se khaacha tha, chaaku ke ek side mein kadhaai kaam to dusri side mein do sher ke chitra banaye gaye the... aur chaaku ka sirhana thoda sa muda huva tha...

"matlab king, ye dekho..!! is prakar ka chaaku kiske paas reh sakta hai...? flesher, chickenwala, bhangarwala, hotelwala...??? kaun aisa vichitra prakar ka chaaku rakhta hoga...?? thik hai woh sab jane do, gaanv mein us raat ke baad kaun kaun naya aaya hai, iski information nikali kya tumne..." Ravi ne pucha...

"han saahab... matlab gaanv ke jamin ke silsile mein baatchit karne ke liye dhannalal ke paas 4-5 log aakar gaye, dhannalal ke paas toh logon ka aana jaana rehta hi hai baaki sab kul milakar aisa koyi bhi naya vyakti nahi aaya saahab..." aapna sar khujata huva king bola... "han... woh detective Rahul aaya tha, munnidevi ki hatya hone se pahile..." achanak kuch sochkar king ne bich mein hi rahul ke aane ki baat jod di...

"detective Rahul...!! mujhe woh aadmi kuch thik nahi laga... iski maa ki aankh kidhar se achanak aata hai...?? hatyaaon ke barein mein puchta kya hai...??" Ravi kuch sochta huva bola...

"par saahab..., unke papers sab check kiye the naa aapne..?? government certificates hi the naa...??" King...

"are King, aise pachchason papers baahar banake milte hai... kis hisab se woh sahi honge...?? King ek kaam karo, lekar aao use kal idhar, jara thik se janch karni padegi uski..." Ravi apni jagah se uthta huva bola...

-----------------------

Rahul balcony mein dubte huve suraj ko dekhta huva baitha tha... jeb mein se cigaratte ka ek packet nikal kar usne andar ek najar maari... aakhir ki chaar cigarattes bachi huyi thi usne ek lambi saans li aur woh packet wapas apne jeb mein daal diya... fir woh ekdam aaram se khada huva aur room mein gaya... usne khud ke liye ek coffee bana li aur wapas balcony mein aakar baith gaya... coffee ke do kadak ghunt pikar bhi uski cigaratte pine ki tadap nahi jaa rahi thi, aakhirkar usne ek cigaratte jala li aur uska ek lamba kash maarta huva woh chair par aaram se pair pasar kar baith gaya.

din ba din un hatyaaon ki khabar dur dur tak fail rahi thi... bohot dino baad media walon ko bhi koyi masaledaar khabar mil gayi thi joki utni masaledaar nahi thi...

'shirgaon mein sannata...'
'shirgaon mein maut ka darinda...'
'shirgaon huva paagal khunika shikar...'

yeh aur aise anek 'breaking news' tv par dikhaye jaa rahe the aur shirgaon gaanv kaa naam shahron mein fail raha tha...

'is case ko aisi hi publicity milni chahiye...' Rahul khud se hi soch vichar karta huva bola... 'uske liye aur do tin khun ho jaaye toh bhi koyi gum nahi...' is case k publicity se hi apni publicity hogi aur wapas ekbar naye josh ke saath shuruvat kar sakunga...' Rahul man hi man soch raha tha...

cigaratte ka dhunvaa aakash mein choadta huva woh dubte huve suraj ko dekh raha tha... Inspector Ravi ke paas se hi usko khun ki information mil sakti hai yeh use acche se maalum tha...

uske paas se information nikaal ne ke liye pahile use gaajar dikhana padega... apna is kaarya mein sahakarya upyukt hai iski bhaavna uske man mein aa gayi toh shayad woh mujhe kuch information de sakta hai aise kuch khayalat uske man mein aaye...

yehi sab sochta huva uska man bhutkaal mein pravesh kar gaya........

Rahul maansi ke air-conditioned bedroom mein bed par soya huva tha... uske haat par apna sar rakh kar Maansi uske bagal mein soyi huyi thi... uske gore gore badan ke pithe par uske kaale baal lehra rahe the... hathon par jyada jor lagne par usne apna haath uske sar ke niche se dhire se nikal liya...

Rahul ke hilne se Mansi ne apni aankhen halke se kholi... usne pyaar se ek baar rahul ko dekha... Rahul ekdam ghode bechkar so raha tha... apne upar ki chaadar side mein kar ke woh wardrobe ke bade se shishe ke saamne khadi hokar khud ke saundarya ko nihar rahi thi...

apne baal ko sanvarne ke baad, room mein pade huve apne kapdon ko samet kar woh nahane ke liye bathroom mein ghus gayi... koyi ek aadh ghante baad baahar nikal ke baad samne Rahul ko kapdon mein dekh kar uske maathe par bal pad gaye...

"kidhar jaa raha hai..."

"ek do ghante mein aata hun mein... Ms. Singh ka phone aaya huva tha... unko unke kaam ke reports chahiye abhi ke abhi..."

"par Rahul...!!"

"Maansi... tumhein toh pata hi hai naa woh buddhi kitni khusat hai...! ek toh pehle se hi clients kam hai mere, jo hai unka toh khayal rakhna hi padega na..."

"par Rahul...!! tum yeh sab choad kar koyi office kyun nahi join kar lete...? i really love you rahul, and i want to get married with you...!!"

"Maansi... please abhi nahi..."

"Rahul... mujhe pata hai ki tumhein detective jobs pasand hai... fir tu thomson agency join kar naa... unka clients base bhi bohot bada hai... regular paisa toh milta rahega..."

"kaun...! woh harami thomson...! Maansi please... teri yeh faaltu idea tu apne paas hi rakh... meri professional life mein dakhal mat diya kar..."

"Rahul...? teri life...? teri life kya meri life nahi hai...?"

"mujhe waisa nahi bolne ka tha Maansi..."

"Rahul... mujhe lagta hai ki apna isi vishay par bohot baar jhagda huva hai... aur aage bhi hota rahega... Rahul tujhe ek ko chunna padega..."

"Maansi... please abhi nahi, mujhe kaam hai, shaam ko baat karte hai..."

"nahi Rahul... shaam ko nahi abhi..."

"thik hai fir Maansi... mein mera profession kisi ke liye nahi choad sakta..." lambi saans choadta huva Rahul bola aur wahan se nikal gaya....

nirash hokar Maansi piche mudi aur wardrobe ke saamne khadi hokar sajne sanvarne lagi, lekin uski aankhen bhar aayi thi... isi kaaran usko apni chavi aayne ke saamne dhundali najar aa rahi thi.. gaalon par se ashruon ki dhaar ko rokne ki naakam koshish karte huve woh dhaddaam se bed par gir gayi aur takiye mein apna muhn chupakar subakne lage...

..... hath mein pakde huye cigaratte ka garam chatka lagne par Rahul apne bhutkaal se waapas aaya... "Maansi... yess...!!!, Maansi is kaam mein meri madat kar sakti hai..." haath mein pakda huva cigaratte ka tukda fenkta huva Rahul uth khada huva...

"ravi saahab mein jara aapka ye fax machine istemaal kar sakta hu kya...? nahi... waise matlab ki is chaaku ke baarein mein hi jyada jaankari haasil karne ke liye istemaal kar raha hun..." Ravi ke jawab kaa intezaar kiye bina hi Rahulne haath mein pakde huva chaaku ka sketch fax machine mein dala... side mein ek note likhi huyi thi 'adhik jaankari chahiye...' aisa adhi tuti huyi pencil se likh kar usne woh kagaz Maansi ko fax kiya...

Gaanv ki panchayat, kuch patrakar, kuch nayi news nahi thi isliye gade mudde khodne ke liye 'breaking news' karnewale channelswalon ke prashno se inspector Ravi khij gaya tha... nayi jaankari ka kuch bhi strotra hath mein nahi lag raha tha... aani usi samay Rahul ne unki mulakaat lekar usko kuch mile huve sabuto ki jaankari di thi... unko usne us jagah par le gaya tha... aur khet mein paaye gaye tyre ke nishaan aur uspar nikala huva tark unko bataya tha...

arthat woh jaankar kuch jyada upyukt nahi thi aisa nahi tha, aur ispar jyada kuch haasil nahi huva tha, parantu in mandaliyon ko kuch thoda bahut dene ke liye Ravi ko kuch mil hi gaya tha... kuch samay ke liye toh inke muhn band ho gaye the... aur isi vajah se Ravi ne bhi uske paas ki kuch jaankari Rahul ko de di thi...

khun ke jakhmo se taknishiyan ne ek chaaku ka chitra banaya hota tha aur wohi kuch khaas jaankari mein se ek Ravi ne woh chitra Rahul ke diya huva tha...

pichle 3 mahino se Maansi Rahul ke saath nahi thi, par yeh fax usko milte hi woh mujhe jarur kuch madad karegi aisa usko dridh vishwas tha...

is chitra ki sahayata se Maansi internet se is chaaku ke barien mein kuch na kuch toh jaankari jarur nikal sakegi aisa usko lag raha tha aur isliye jyada naa sochte huve usne woh kagaz Maansi ko fax kar diya tha...

*****************

Maansi apne office ke kaamo mein vyast thi utne mein side mein rakhe huye fax machine ka 'incoming fax' tone bachne laga... Maansi ne 'accept' ka hara button daba diya aur fax ka paper roll ghumne laga... us fax ke paper par vichitra chitra ko dekh kar uske maathe par bal pad gaye... usne woh paper ulat pulat kar dekha fir usko side mein chote akshoron mein Rahul ne likha huva note dikhayi diya...

Maansi ne woh kaagaz dhaddam se ek side rakh diya aur wapas apne kaam mein vyast ho gayi...

shaam ko ghar nikalte samay table par ke paper achche dhang se rakhte samay achanak uska dhyan us fax paper par gaya aur woh use wapas dhyan se dekhne lagi...

"Rahul ko kyun chahiye rahegi iski jaankari...? itne din ke baad Rahul ko wapas koyi nayi case mil gayi kya...?" Maansi ke dimaag aise anek prashn ghumne lage... usne us kagaz par fax kahan se kiya gaya hai woh phone number dekha... fir baaju mein rakhi huyi telephone diary kholi aur jilhaa-taalukaa ke yaadi mein usne woh number dhudna shuru kiya...

"shirgao..." dhundte dhundte usko ek jagah par us gaanv kaa code mila... kuch hi kshano mein use kuch din pehle paper mein aur news mein breaking news diye huye do khun yaad aaye...

aakhirkar usne ek lambi saans li aur apne haath ka kaam side mein rakhkar usne google naamak site open ki aur chaaku vishayi adhik jaankari denewali websites search karne lagi...
bohot der ke baad khojne par use jo chitra chahiye tha woh mil hi gaya... wohi nakshikaam, wohi chinh, wohi aakaar...

Maansi ne side mein ek kaagaz nikala, chehre par aanewale apne kaale kajrare baalon ko apni ungliyon se piche kiya aur pencil se us kaagaz par website par ki jaankari likhne lagi..

**************

Maansi ke man se Rahul kabhi gaya hi nahi tha aur ab Raahul ko apni garaj hai aisa use rah rah kar lag raha tha... aur isliye usne 'shirgaon' jaane ka nirnay liya... kaam pura hote hi woh ghar gayi aur do-chaar din ke kapde, thode paise aaur kuch saaman lekar woh 'shirgaon' ke liye ravana ho gayi... Rahul ko phone kar ke 'mein aa rahi hun' aisa moh usne taal diya tha...

aisa achanak jaakar use surprise dena aur us din ke liye kshama mang kar sidha uske gale lagna, yahi sab sochte huye woh apni gaadi speed mein bhaga rahi thi...

raat ke 9.30 baj kar gaye the... bohot der se gaadi chalate chalate woh thak gayi thi isliye gaadi ko side mein lekar woh gaadi se baahar nikali aur pahadiyon ke thandi hawa uske sharir par padte hi usne apni aankhen mund li... ladkiyon mein 'sixth sense' rehta hai aisa suna hai... koyi toh idhar hai... ya fir tha...!

ek kshan ke liye use aisa laga ki turant gaadi mein baith jaaye, par us samay jo use laga woh bhram tha ya fir koyi sach mein idhar tha yeh maalumaat karne ke liye woh dhire dhire aage chalkar gayi... aur saamne ki jhaadiyon ko halke se side mein kiya lekin saamne andhere mein kuch dikhayi nahi de raha tha... baahar se andar ka kuch bhi dikhayi nahi de raha tha... par andar se, jo koyi rahega use Maansi spasht dikh rahi thi... dar ki ek sanvedana Maansi ke sharir se behne lagi... Maansi turant baaju mein ho gayi...

thoda bohot dhundane par use kuch haasil nahi huva isliye Maansi wapas aayi... gaadi ka darwaja khol ke andar baithne hi waali thi ki uski najar ek jagah par sthir ho gayi... gaadike thoda aage ek gobar kaa dher pada huva tha... aur ek side mein... haan pakka... kisi ke toh... maanvi paav ke nishan the...

'pahile se hi yeh aisa hai ki...? abhi...' Maansi ne bohot yaad karne ki koshish ki par use kuch yaad nahi aaya...

'kisi gaavwale ka rehna kam hai, kyunki woh juton ka nishan tha... aur gaav ke log jutein pehnte rahenge...' yahi Maansi soch rahi thi...

idhar jyada der tak rukna thik nahi hai aisa soch kar woh turant gaadi mein baith gayi aur sidha Shirgaaon mein ruki...

dhaai-tin haajar ke lokvasti mein base huve Shirgaaon mein Rahul ko dhunde mein use koyi kadhinayi nahi huvi...

counter boy ne ekbaar Maansi ko upar se niche tak nihaar kar Raahul apne room mein nahi hai aisi jaankari di...

thodaasa khijte huye hi Maansi ek khurji par baith gayi... aaju baaju kuch nahi tha isliye usne side mein rakha huva ek junaa newspaper uthaya aur gaav mein ghatit huyi ghatna woh paper mein padhne lagi... jyadatar ek ghanta beet gaya hoga... darwaja ka aawaj sunkar usne upar dekha...

Maansi ko dekh kar aascharyachakit huva saa Rahul darwaje par khada tha... rahul ke dekhte hi haath mein pakda huva paper fenkar bhaagte huye jaakar woh rahul ke gale lagi...

"surprise..." lagbhag chillate huye hi woh boli... par uska aanand jyada der naa tik paya

"shi... kitna ganda baas aa raha hai tere sharir mein se... naahati nahi hai kya...? chal pehle room par aur naaha le, baad mein baat karenge..." aisa bolkar usne apna saaman uthaya aur woh Rahul ke piche piche chal padi...

to be continued...
Rahul jab fresh hokar aaya tab Maansi bed par silky nighty pehankar soyi huyi thi... Rahul ko dekhte hi woh uthkar uske paas aayi aur uske gale par apni baahein lapetkar ek chumban uske honto par diya...

"missed you dear... and i am so sorry..." Maansi pyaar se boli...

"no... i m sorry Maansi... and let me also confess it..." aisa bolke usne bhi usko usi garmjoshi ke saath apne se aur sata liya aur dirgh chumban uske honto par diya...

... chumban toad kar "par tu idhar kaise...?? aur tujhe kaise pata chala ki mein idhar hun...??" Rahulne pucha...

"ek detective ki girlfriend hun... toh uske thode bahut gun toh mujh mein rahenge hi naa...?" prashnatmak mudraa mein Maansi ne jawab diya, "ye... par kya yaar... kaun saa yeh gandaa hotel dhundaa hai...? koyi achcha hotel nahi hai kya idhar...?"

"hmm... thik hai..." aisa bolkar Rahulne abhi tak ki puri detail use bata di... "toh aisa hai dekh sab kuch... is case ko kitni publicity mil rahi hai tujhe toh pata hi hai... kal agar jaanchpadtal mein police logo se bhi jyada progress kar saka toh is case ke sath sath hi mujhe bhi kitni publicity milegi... fir case solve huva ho ya naa huva ho... khuni pakda jaye yaa naa jaaye.. ekbaar agar meraa naam aaya toh city mein jaakar pure jor shor ke saath wapas shuruvat kar sakunga..."

"woh thik hai yaar... lekin police bhi kya so nahi rahi hai... tujhe bohot kasht uthane padenge police ko pichche choadne ke liye..." Maansi apne baal sidhe karte huye boli, "ye... tu aisa kyun nahi karta...? tuhich aur ek do khun kar de naa...! aur tuhich sabh kuch sabut ikattha kar ke police ko de de... us spiderman jaise..."

"spiderman...?" Rahul...

"han.. matlab dekh naa... 'piter parker' the photographer rehta hai aur wohi spider-man... khud hi khud ke photos nikal kar paise kamaata hai... waisa hi..." aisa bolkar Maansi jor jor se hasne lagi...

Lekin Rahul kuch bhi nahi bolke khidki ke baahar dekh raha tha...

"ye... mein maskari kar rahi thi han nahi toh sahi mein khun-bin karega... chal abhi sote hai, mujhe bohoto nind aa rahi thi..." aisa bolkar Maansi ne bulb band kar diya...

... rat ko kuch bhi kar ke Maansi ko nind nahi aa rahi thi... baar baar hildol rahi thi... isliye khijte huve Maansi uthkar baith gayi... Rahul baju mein gehri nind mein tha...

"kyun nind nahi aa rahi hai...?" Maansi ne khudse hi sawal pucha, "shayad, badli huyi jaga, shayad aisho-aaram, malmali bed ke bajaye yeh ekdam kadak gaadi ka bed..., nahi wajah kuch aur hi thi, jhunjhlaahat... kholibhar kisi praakar ka ek gandh aa raha tha, kaisa gand...? shayad gobar kar...???"

Maansi teji se uthi, "gobar ka gandh..!!, us road par, udhar, pakka koyi toh tha, udhar ke gobar mein kisi ke toh pair nishan bane huye the meine dekha tha..."

Maansi bed par se niche utari, chupchaap woh darwaje ke najdik pahunchi... woh gandh aur bhi tej ho gaya tha... Maansi ne dhire se Rahul ke shoes uthaye... uska shak sahi nikla, Rahul ke ek juta ke niche gobar chipka huva tha...

"Rahul...!! udhar Rahul tha..? nahi, aisa sambhav nahi... woh udhar aaya bhi hoga toh mujhe dekh kar chhup kyun gaya...? usko toh pata bhi nahi tha ki mein aanewali hun...? yaa fir yeh ek sanyog tha...? ki...!!!"

******************

Subah subah Rahul Maansi ko pura gaav dikhane ke liye lekar gaya... shaam ko Rahul aur Maansi dono police station gaye... Rahulne Maansine laaye huva chaaku ki information ke papers Ravi ko diye...

"yeh kaun..?", haath mein pakde huye kaagaz ko dekhte hi Ravi bola...

"yeh Maansi...! meri asistant... isne hi chaaku ke sambandhi adhik information nikaal kar layi hai..." Rahul bola...

"1836? is year ka yeh chaaku hai aisa bolna hai kya aapka...?" Inspector Ravi abhi bhi woh kagaz ki information padhta huva bola...

"han Ravi sahab... us chaaku par ke chitra, hight, width sab ek jaisa hi hai.... 1836 mein Jaipur ke maharaja ne uske vishwasu nokar ko yeh chaaku bhent di thi... parantu uske baad woh kis ke paas kidhar se is gaav mein aaya iski information nikalna thoda kathin hai..." Rahul

"hmm.. lekin tum jaisa bata rahe ho, us hisaab se yeh chaaku khandaani logo ke paas hi rahne ki sambhavna hai... aur yeh agar sahi hai toh shirgaon mein khandaani parivar matlab..."

"munnalal...?" inspector Ravi aur Rahul ekdam eksath bole...

"iska matlab tumhe yeh kehna hai ki yeh sab khun koyi dhannalal hai unhone kiye hai...?" Maansi ne pucha...

"nahi...! abhi se yeh sab kehna yogya nahi hai... kyunki dhannalal is gaaon ke ek pratishtit vyakti hai... shayad yeh bhi ho sakta hai ki unke kisi naukar ne yeh kartut ki ho...! shayad unko is chaaku ke vishay mein adhik jaankari ho, isse jyada jaankari shayad hamein wahin milegi..." inspector Ravi khursi par se uthta huva bola... "alex gaadi nikalo hamein abhi ke abhi dhannalal sahab ke paas jana chahiye..."

"par saahab, abhi..? abhi raat hone ko aayi hai... kam se kam ek phone kar ke unse ijajat toh le le..." Alex...

"Alex, kaam bohot hai, chalo tum," apni topi ko uthakar Ravi kab ka baahar nikal gaya... unke piche piche Rahul aur Maansi bhi gaadi mein jaakar baith gaye...

*************************

Dhannalal saahab ki haweli C.F.L. aur tubelights ke safed prakash mein jagmaga rahi thi... gate ke paas 2-4 gadiyan, guards, isse dhannalal saahab ka aan baan shaan dikh rahi thi...

"dhannalal sahab ko milna hai, ghar mein hai kya...?" Ravi ne darwaje par hi guard se pucha...

"woh toh abhi abhi baahar gaye hai, kheton mein chehalkadmi karne ke liye...!" guard ne jawab diya...

"Alex tum idhar ruko, mein dekh kar aata hun.." aisa bol kar Ravi kheto ki taraf nikal gaya, uske piche piche Rahul aur Maansi bhi the...

Dhannalal sahab ke khet haweli se lagte huye mailo dur faile huye the... haal filhal huye baarish ke kaaran achchi khasi fasle ug gayi thi... aakash mein vapas kaale baadal mandrane shuru ho gaye the...

joron ki hawa chal rahi thi aur uski wajah se honewala aawaj se sharir par sirhan paida ho rahi thi.... chandani raat mein agal bagal kisi ke bhi hone ka anuman nahi lag raha tha...

"Dhannalal Sahab..." inspector Ravi ne aawaj lagayi... kuch kshan shanti purvak gaye... lekin aawaj ka koyi bhi pratiuttar nahi aaya...

"Dhannalal Sahabbbb..." inspector Ravi ne wapas aawaj lagayi...lekin isbar bhi pratiuttar nahi aaya...

"Rahul... hum tino alag alag dishaon mein jaate hai aur dhannalal sahab ko dhundate hai... dus minute baad wapas idhar hi milte hai..." aisa bolkar inspector Ravi kheton mein ghus gaya...

us nirjan kaali andheron mein Maansi akeli khadi thi... uski aankhen andheron mein andaza lagane ka prayas kar rahi thi... 5 minute bit gaye lekin kuch bhi aahat nahi huyi... aur usi samay apne ekdam nikat koyi toh hai aisa use mehsus huva... ek sihran uske pure sharir se daud gayi... ridh ki haddi mein thand ki lehar se sikudan paida ho gayi....

Maansi koyi bhi aahat karne ke liye ghabra rahi thi... aahat karne se usko apni gatividhi ka pat chal jaye aur woh apne ko dhardaboche... isliye Maansi ekdam stabdh khadi thi...

uske piche kisi ke toh chalne ki aahat huyi aur woh aawaj uske ekdam karib aane laga... aawaj ekdam najdik najdik aate ja raha tha... aur ekdam najdik uske piche aakar ruk gaya...

Maansi ki saanse jor jor se chalne lagi... gala sukh chuka tha... chalne ka woh aawaj aana ruk gaya tha... koyi aaya bhi hoga toh woh Maansi ke ekdam piche khada tha... Maansi dhire se piche ko ghumi....


to be continued...

Post a Comment: